Die Derduiwel
Daar was ‘n klein gediertetjie
Skaars so groot soos ‘n fee
Met ‘n voorkoms erg verskriklik
Maar nie die soort wat jou nagmerries gee
Op sy rug was twee klein vlerkies,
Sy vel: bloedrooi, met skubbe op,
Hy’t skerp, gepunte tande,
en ook twee horings op sy kop
Sy ore was veels te groot
En sy neus was meer van ‘n snoet
En nog ‘n lang maer stert ook
Saam met al die ander goed!
Dis ‘n gelag en ‘n gekekkel,
Dis ‘n gespoeg en gespat en gesis
Ons noem hierdie knaap ‘n Derduiwel
‘n regte klein vabond is wat dit is.
Die klein ondeug is wild en onvoorspelbaar,
Dit streef die heeltyd net na pret,
En met truuks en poetse en planne
Vang hy mense heeltyd in sy net.
Daar was byvoordeel hierdie seun,
Sy naam was Tommie Buys
Hy’t rustig van die skool gestap
Op pad na sy eie huis
Die Derduiwel het ‘n strik gestel
Sy hande gevryf en gelag
En toe net ‘n entjie verder
Agter ‘n boom gaan wag.
Tommie het dadelik ophou stap
Toe hy iets glinsterend sien blink
“Dis ‘n muntstuk, ag hoe lekker!”
Het Tommie hard gedink.
Hy kon sy geluk nie glo nie
En buk om dit op te tel
Maar die muntstuk wil nie beweeg nie
Kan jy dit oorvertel!
Die derduiwel wil hom pap lag
Hy’t dit vasgeplak met gom,
Tommie hoor die gegiggel
En kyk baie vinnig om
Hy kyk in die bosse
Maar die derduiweltjie was weg
Toe stap Tommie maar aan huis toe
En voel effens vreemd en effens sleg.
Later daardie aand
Is Tommie by die huis
Hy begin met al sy takies,
Dink hy’s alleen en als is pluis
Maar die Derduiwel \et so wraggies
Sy huis binnegeglip
En daar stel hy vir arme Tommie
In die kombuis toe nog ‘n strik!
Hy kruip agter die gordyn weg
En sit stilletjies en wag
Tot Tommie daar kom tee maak
Bietjie later in die nag.
Hy maak sy tee en roer dit
En besluit om suiker ook te kry
Twee lepels uit die suikerpot
Gooi hy toe sommer by.
Hy stap na die sitkamer
En gaan sit lekker in sy stoel
Maar toe proe hy sy tee
En voel hoe walging deur hom spoel.
Sonder om te dink of wag
Spoeg hy dat dit spat
Daar trek tee oor die tafel
Die stoele, en die mat!
Die tee smaak sommer aaklig
Maar dis nie Tom se fout
Die Derduiwel het sy suiker
Sowaar vervang met sout.
Die gedoente gee ‘n giggel
Voor hy buitekant toe snel
Om daarso sy finale
En sy grootste strik te stel.
Tommie weet teen die tyd
Daar was iemand in sy huis
So hy loop ligvoets waar hy gaan
So saggies soos ‘n muis.
Die deur was halfpad oop en daar
Was spore op die vloer
Hy wou net die deur oopmaak
Maar toe sien hy daarso loer
op die half-oop deur ‘n emmer
daar gebalanseer
maak die deur net effe oop
en die water val dan neer!
“Jy kan nie my nie vang nie” het hy geroep
en versigtig deur gegly,
“Kyk, ek loop versigtig deur” sodat
jou simpel emmer bo kan bly!”
Die derduiwel kom uit sy wegkruipplek
Sy kop hang sommer skaam
“Ek is jammer, dis net ‘n speletjie,
al speel daar niemand saam.”
Ek het gehoop dat jy saam met my
Vir my grappies sou kon lag
En dan miskien my vriend wees,
Want dis waarna ek smag.
“Hierdie poetse wat jy bak” sê Tommie
“Is ‘n baie lawwe gier,
As maats is wat jy eintlik soek,
Is daar ‘n makliker manier”.
“Gaan na die speelpark
Waar die kinders lag en voel
Ek wed jou jy sal iemand kry
Wat dieselfde voel.”
“Vra of jy kan saam speel
Selfs as dit moeilik voel
Sommer vinnig gaan jy lekker speel
Met maats vir jou bedoel.”
“Maar ek is so lelik” sê die Derduiwel
en gee ‘n snik
“Dit gaan oor hoe jy binne lyk”
sê Tommie in sy skik.
“Gee ‘n vriendelike glimlig,
wees gaaf, hulpvaardig en bly
En so sal jy sommer gou
‘n klompie vriende kry.
Die Derduiwel het sy les geleer
En was net reg om te gaan
Toe Tommie sê “Kan ek iets vra?”
En die Derduiwel stil gaan staan.
“Beloof my jy sal ophou
met aanhoudend poetse bak?”
Die Derduiwel het sy kop geskud
“Natuurlik, in die haak.”
‘Wil jy dan my vriend wees?”
“Ja!” gil die Derduiwel vol geluk
Hy spring of en af en giggel
En gee die seun ‘n druk.
“Kan ons twee dan gaan speel?”
vra die duiweltjie half skaam
“Natuurlik!” sê Tommie
en hulle twee speel tot vandag toe nog steeds saam.